巴西出局，阿根廷惨败，阿拉球迷和总呆煞类，前两日还道该世界杯要变成美洲杯，结果骨勒一记，咦变成欧洲杯类。

　　西班牙对巴拉圭个比赛，球迷第一总忖西班牙赢球是交关轻松一样事体，看煞巴拉圭要输。顶压煞巴拉圭输是输类，不过比赛辰光正式是吓勒西班牙刮刮抖。该场比赛就像做一场戏文，3分钟里厢2只点球，该已经交关稀奇类，还要稀奇个是，该2只点球和总会踢勿进。球迷个心情，像人家坐过山车一样，七上八落。

　　比赛结束辰光，巴拉圭队点球呒没踢进个卡多索哭勒花脸猫一样，打击实在是忒大类，如话其点球踢进，格比赛结果真道话交关难讲类。记者 陈韬

　　本栏目方言指导：宁波大学周志锋教授